குஜராத்தில் தாமரைகள் “குஷி”.. விட்டதை பிடிக்கும் பாஜக! கவிழும் காங்கிரஸ் - 2017 தேர்தலுடன் ஒப்பீடு

காந்திநகர்: நடந்து முடிந்த குஜராத் மாநில சட்டசபைத் தேர்தலில் பாஜக அதிக இடங்களில் வெற்றிபெறும் என்று தேர்தலுக்கு பிந்தைய கருத்துக்கணிப்புகள் தெரிவிக்கும் நிலையில், கடந்த 2017 தேர்தல் முடிவுகளுடன் சற்று ஒப்பிட்டு அலசுவோம்.

பிரதமர் நரேந்திர மோடி, உள்துறை அமைச்சர் அமித்ஷா ஆகியோரின் சொந்த மாநிலமான குஜராத்தில் பாஜக 27 ஆம் ஆண்டுகளாக ஆட்சிக்கட்டிலில் இருந்து வருகிறது.

அக்கட்சியின் கோட்டையாக பார்க்கப்படும் குஜராத் மாநிலத்தில் பூபேந்திர பட்டேல் தலைமையிலான குஜராத் அரசின் பதவிக்காலம் நிறைவடைந்ததை அடுத்து தேர்தலை நடத்த தேர்தல் ஆணையம் முடிவு செய்தது.

2 கட்ட தேர்தல்

அதன்படி டிசம்பர் 1 ஆம் தேதி மற்றும் 5 ஆம் தேதி 2 கட்டங்களாக சட்டசபைத் தேர்தல் வாக்குப்பதிவு நடைபெறும் என இந்திய தலைமை தேர்தல் ஆணையம் அறிவித்தது. அதன் அடிப்படையில் கடந்த டிசம்பர் 1 முதல் கட்ட வாக்குப்பதிவு நடத்தி முடிக்கப்பட்டது. இன்று 2 வது கட்ட வாக்குப்பதிவு நடைபெற்று மாலை 5 மணியளவில் முடிவுக்கு வந்தது.

மும்முனைப் போட்டி

பல்வேறு பரபரப்புகளுக்கு மத்தியில் நடந்து முடிந்த இந்த தேர்தலின் முடிவுகள் வரும் டிசம்பர் 8 ஆம் தேதி வாக்குகள் எண்ணப்படும் என்று இந்திய தலைமை தேர்தல் ஆணையம் அறிவித்து இருக்கிறது. இந்த தேர்தலில் பாஜக, காங்கிரஸ், ஆம் ஆத்மி கட்சிகளிடையே மும்முனைப் போட்டி நிலவியது. பிரதமர் மோடி, ராகுல் காந்தி, அமித்ஷா அர்விந்த் கெஜ்ரிவால் உள்ளிட்ட பல தலைவர்கள் குஜராத்தில் முகாமிட்டு பிரச்சாரம் செய்தனர்.

தேர்தலுக்கு பிந்தைய கருத்துக்கணிப்பு

இந்த நிலையில் தற்போது தேர்தலுக்கு பிந்தைய கருத்துக்கணிப்புகளை பல்வேறு ஊடகங்களை எடுத்தன. அதன்படி தற்போது டிவி 9 குஜராத்தி, ரிபப்ளிக், நியூஸ் எக்ஸ் தொலைக்காட்சிகளின் கருத்துக்கணிப்பு முடிவுகள் வெளியாகின. இந்த முடிவுகள் அனைத்தும் பாஜக மீண்டும் குஜராத்தில் ஆட்சியமைக்கும் என்றும், காங்கிரஸ் 2 வது இடத்தையும், ஆம் ஆத்மி 3 வது இடத்தையும் பிடிக்கும் என்றும் தெரிவிக்கின்றன.

சராசரி முடிவுகள்

இந்த கருத்துக்கணிப்பு முடிவுகளின் சராசரியின்படி ஆளும் பாஜக 123 முதல் 139 இடங்களில் வெற்றிபெறும் என்றும், காங்கிரஸ், தேசியவாத காங்கிரஸ் கூட்டணி 35 முதல் 48 இடங்களில் வெற்றிபெறும் எனவும் இந்த தேர்தலில் 3 வது அணியாக களமிறங்கிய ஆம் ஆத்மி கட்சி 4 முதல் 9 இடங்களிலும் மட்டுமே வெல்லும் என்றும், இதர கட்சி, சுயேட்சை வேட்பாளர்கள் 1 - 9 இடங்களில் வெல்வார்கள் என்றும் தெரிகிறது.

2017 தேர்தல் முடிவுகள்

கடந்த 2017 தேர்தல் முடிவுகளை எடுத்துக்கொண்டால் பாஜக இதில் விட்டதை பிடிக்க இருப்பது தெளிவாகிறது. 2017 தேர்தலில் அக்கட்சி கைவசம் இருந்த பல முக்கிய தொகுதிகளில் தோல்வியை தழுவி 99 இடங்களில் மட்டுமே வெற்றிபெற்றது. அதே நேரம் காங்கிரஸ் கடைசி வரை கடும் நெருக்கடி கொடுத்து 77 இடங்களில் வென்றது. சுயேட்சைகள் 3 இடங்களிலும், பாரதிய பழங்குடியின கட்சி 2 இடங்களிலும், தேசியவாத காங்கிரஸ் ஒரு இடத்திலும் வெற்றிபெற்றன.

English summary

As the exit polls suggest that the BJP will win more seats in the recently concluded Gujarat state assembly elections, let us compare and analyze the results of the last 2017 elections.