ப்ளூட்டோவுக்கும் அப்பால் ஒரு கிரகம் இருக்காம்... அது பூமியை விடப் பெரிதாம்!

Published: Thursday, January 21, 2016, 14:43 [IST]

Subscribe to Oneindia Tamil

நாசா: ப்ளூட்டோதான் நமது சூரியக் குடும்பத்தில் கடைசி என்பது நாம் ரொம்ப காலமாக கூறி வருவது. ஆனால் இப்போது அதையும் தாண்டி ஒரு புதிய கிரகம் இருக்கலாம் என் விஞ்ஞானிகள் கூறுகின்றனர். அது பூமியை விடப் பெரிதானது என்றும் அவர்கள் கூறுகிறார்கள்.

அந்தக் கிரகம் தான் சூரியக் குடும்பத்தின் 9வது கிரகம் என்றும் விஞ்ஞானிகள் கூறுகிறார்கள்.

இந்த 9வது கிரகம், ப்ளூட்டோவுக்கு அப்பால் உள்ளதாம். இதற்கான அறிகுறிகளைத் தாங்கள் கண்டுள்ளதாக இரண்டு விண்வெளி வீரர்கள் கூறியுள்ளனர்.

புதிய கிரகம்...

அவர்களில் ஒருவரான கலிபோர்னியா தொழில்நுட்பக் கழகத்தின் பேராசிரியர் மைக்கேல் பிரவுன் இதுகுறித்துக் கூறுகையில், ‘இந்தப் புதிய கிரகமானது ப்ளூட்டோவுக்கு அருகே இருக்கலாம். இது பூமியை விடப் பெரிதாக இருக்கலாம் என்று தெரிகிறது. இது ஒரு முழுமையான கிரகமாக இருக்கலாம் என்றும் நம்புகிறோம் என்றார் அவர்.

சந்தேகமேயில்லை...

இன்னொருவரான கான்ஸ்டான்டைன் பாட்கின் கூறுகையில், ‘நிச்சயம் ப்ளூட்டோவுக்கு அப்பால் ஒரு கிரகம் உள்ளது. அதில் சந்தேகமே இல்லை.

சூரியக்குடும்பம் தான்...

அது மிகப் பெரிதாகவும் இருக்கலாம். முழுமையான கிரகமாக அது இருக்கும் என்று நம்புகிறோம். நமது சூரியக் குடும்பத்தைச் சேர்ந்ததாக இது இருக்கலாம்' என்கிறார்.

10 மடங்கு அதிகம்...

இவர்கள் சொல்லும் இந்தப் புதிய கிரகமானது பூமியை விட மிகப் பெரிதாக இருக்கும் என்று நம்பப்படுகிறது. ஒரு மினி நெப்ட்யூன் என்று சொல்லப்படும் அளவுக்குப் பெரிதாக இருக்கலாம் என்று தெரிகிறது. மேலும் இதன் நிறையானது பூமியை விட 10 மடங்கு அதிகமாக இருக்கும் என்றும் கருதப்படுகிறது.

ப்ளூட்டோ...

ப்ளூட்டோதான் சூரியக் குடும்பத்திலேயே கடைசியில் உள்ளது. வெகு தொலைவில் உள்ளது. சூரியனிலிருந்து 4.6 பில்லியன் மைல்கள் தொலைவில் அது உள்ளது.

20,000 வருடங்கள்...

தற்போதைய புதிய கிரகமானது சூரியனிலிருந்து 20 பில்லியன் மைல்கள் தொலைவில் இருக்கலாம் என்று நம்பப்படுகிறது. இவ்வளவு பயங்கர தூரத்தில் அது இருப்பதால் இது சூரியனை ஒருமுறை சுற்றி வரவே குறைந்தது 10,000 முதல் அதிகபட்சம் 20,000 வருடங்கள் வரை ஆகலாம் என்று நம்பப்படுகிறது.

சுற்றுப்பாதை...

இந்த கிரகமானது சரியான எந்த சுற்றுப் பாதையில் உள்ளது என்பது விஞ்ஞானிகளுக்குத் தெரியவில்லை. அதைக் கண்டுபிடிக்க முடியாமல் திணறுகின்றனராம். இப்படி ஒரு புதிய கிரகம் இருப்பது உண்மையாக இருக்கலாம் என்று பிரெஞ்சு ஆய்வாளர் அலெசான்ட்ரோ மார்பிடெல்லியும் கூறியுள்ளார்.

முக்கிய வேலை...

மார்பிடெல்லி கூறுகையில், ‘நிச்சயம் இது உண்மையாக இருக்கலாம். தற்போது அனைவரின் வேலையும் இந்தக் கிரகதத்தைக் கண்டுபிடிப்பதுதான்' என்கிறார்.

குள்ள கிரகம்...

முன்பு ப்ளூட்டோவும் ஒரு கிரகமாகத்தான் இருந்தது. ஆனால் கடந்த 2006ம் ஆண்டு ப்ளூட்டோவை கிரகத்தின் பட்டியலில் இருந்து விஞ்ஞானிகள் நீக்கி விட்டனர். அதை குள்ள கிரகங்களின் பட்டியலில் சேர்த்து விட்டனர் என்பது நினைவிருக்கலாம்.