இதென்ன ட்விஸ்ட்டு?? அதிமுக கூட்டணி பேச்சுவார்த்தையில் 10+1 சீட்டுக்கு ஒப்புக்கொண்ட தேமுதிக?

சென்னை: திமுக கூட்டணியில் தேமுதிக இணைய இருப்பதாகவும், சீட் எண்ணிக்கை உறுதியாகிவிட்டது என்றும் தகவல்கள் வெளியாகி வந்த நிலையில், அதிமுக கூட்டணியில் இணைவதற்கான பேச்சுவார்த்தையில் முன்னேற்றம் ஏற்பட்டுள்ளதாக தகவல்கள் கசிந்துள்ளன. என்.டி.ஏ கூட்டணியில் தேமுதிகவுக்கு 10 சீட் மற்றும் ஒரு ராஜ்யசபா சீட் உறுதி செய்யப்பட்டுள்ளதாக தகவல் வெளியாகியுள்ளது.

தமிழக சட்டமன்றத் தேர்தல் நெருங்கியுள்ள நிலையில், தமிழ்நாட்டின் இருபெரும் கட்சிகளான திமுகவும், அதிமுகவும் கிட்டத்தட்ட தங்கள் கூட்டணியை உறுதி செய்துவிட்டன. காங்கிரஸ், கம்யூனிஸ்ட், மார்க்சிஸ்ட், விசிக, மதிமுக உள்ளிட்ட கட்சிகள் அடங்கிய பழைய கூட்டணியை திமுக தக்க வைத்துள்ளது.

அதிமுகவை பொறுத்தவரை, பாஜக, பாமக (அன்புமணி), அமமுக மற்றும் சிறிய கட்சிகள் என அந்தக் கூட்டணியும் பலமாக உள்ளது. ராமதாஸ் தலைமையிலான பாமக, தேமுதிக, புதிய தமிழகம், ஓபிஎஸ்ஸின் அதிமுக தொண்டர்கள் உரிமை மீட்புக் கழகம் ஆகிய கட்சிகள் தற்போது கூட்டணிக்காக வலை வீசி வருகின்றன.

தேமுதிக கடந்த ஜனவரி 9 ஆம் தேதி அவர்களின் மாநாட்டில் கூட்டணி பற்றி அறிவிப்பதாக தெரிவித்திருந்தது. ஆனால் அதில் கூட்டணியை அறிவிக்கவில்லை. திமுக மற்றும் அதிமுக 2 கட்சிகளுடனும் தேமுதிக பேச்சுவார்த்தை நடத்தி வருவதாக தகவல் வெளியானது. தேமுதிக இரட்டை இலக்கங்களில் தொகுதிகளை கேட்பதால், திமுகவும், அதிமுகவும் ரொம்பவே யோசித்து வருவதாக தகவல்கள் வெளியாகி வந்தன.

இன்று செய்தியாளர்களைச் சந்தித்தபோதும், யாருடன் இந்த முறை கூட்டணி வைக்க வேண்டும் என எங்கள் மாவட்ட செயலாளர்கள், நிர்வாகிகள் சொல்கிறார்களோ அந்த கூட்டணியில்தான் இணைவோம். தேமுதிகவின் எதிர்காலத்திற்கு எது நல்லதோ அந்தக் கூட்டணியை தேர்ந்தெடுப்போம் என்று கூறினார் பிரேமலதா.

திமுக கூட்டணியில் தேமுதிக இணைய இருப்பதாகவும், சீட் எண்ணிக்கை உறுதியாகிவிட்டது என்றும் தகவல்கள் வெளியாகி வந்த நிலையில், தற்போது திடீர் ட்விஸ்ட்டாக அதிமுக கூட்டணியில் இணைவதற்கான பேச்சுவார்த்தையில் முன்னேற்றம் ஏற்பட்டுள்ளதாக தகவல்கள் கசிந்துள்ளன. என்.டி.ஏ கூட்டணியில் தேமுதிகவுக்கு 10 சீட் மற்றும் ஒரு ராஜ்யசபா சீட் உறுதி செய்யப்பட்டுள்ளதாக தகவல் வெளியாகியுள்ளது. பிரதமர் மோடி தமிழகத்துக்கு பொதுக்கூட்டத்தில் பங்கேற்க வருகை தர உள்ள நிலையில், அடுத்த சில நாட்களுக்குள் இந்தக் கூட்டணி உறுதி செய்யப்படும் என்று தகவல்கள் பரபரக்கின்றன.

English summary

While reports were circulating that the DMK alliance and the DMDK were about to join forces and that the seat allocation had been finalized, information has now leaked that significant progress has been made in negotiations for the DMDK to join the AIADMK alliance. It has been reported that 10 MLA seats and one Rajya Sabha seat have been confirmed for the DMDK within the NDA alliance.