இந்தியாவுக்கு விதிக்கப்பட்ட 25% வரி 18%ஆக குறைப்பு.. பிரதமர் மோடியுடன் பேசிய பிறகு டிரம்ப் அறிவிப்பு

வாஷிங்டன்: இந்தியா மீதான பரஸ்பர வரியை 25% லிருந்து 18% ஆகக் குறைக்க அமெரிக்கா முடிவு செய்துள்ளது. இந்தியாவிற்கும் அமெரிக்காவிற்கும் இடையிலான வர்த்தக ஒப்பந்தத்திற்கு அமெரிக்க அதிபர் டொனால்ட் டிரம்ப் ஒப்புதல் அளித்துள்ளார்.

பிரதமர் நரேந்திர மோடியை அமெரிக்க அதிபர் டிரம்ப் தொலைபேசியில் தொடர்பு கொண்டு பேசினார்.இந்தியா-அமெரிக்கா உறவின் பலம் குறித்து இருநாட்டு தலைவர்களும் பேசினர். இந்த உரையாடலில் வர்த்தக ஒப்பந்தம் ஏற்பட்டுள்ளது. இந்தியா மீதான பரஸ்பர வரியை 25% லிருந்து 18% ஆகக் குறைப்பதாக அமெரிக்க அதிபர் டிரம்ப் அறிவித்துள்ளார்.

டொனால்ட் டிரம்ப் இன்று சமூக வலைதளத்தில் வெளியிட்டுள்ள பதிவில், "இன்று காலை இந்தியாவின் பிரதமர் நரேந்திர மோடியுடன் உரையாடியது எனக்கு ஒரு பெருமை. அவர் எனது சிறந்த நண்பர்களில் ஒருவர், மேலும் தனது நாட்டின் சக்திவாய்ந்த மற்றும் மதிக்கப்படும் தலைவர். வர்த்தகம் மற்றும் ரஷ்யா- உக்ரைன் போரை முடிவுக்குக் கொண்டுவருவது உட்பட பல விஷயங்களைப் பற்றி நாங்கள் பேசினோம். அவர் ரஷ்ய எண்ணெயை வாங்குவதை நிறுத்திவிட்டு, அமெரிக்கா மற்றும் சாத்தியமானால் வெனிசுலாவிலிருந்து அதிக அளவில் வாங்க ஒப்புக்கொண்டார்.

ஒவ்வொரு வாரமும் ஆயிரக்கணக்கான மக்கள் இறந்துகொண்டிருக்கும், தற்போது நடந்துகொண்டிருக்கும் உக்ரைன் போரை முடிவுக்குக் கொண்டுவர இது உதவும்! பிரதமர் மோடி மீதான நட்பு மற்றும் மரியாதை காரணமாகவும், அவரது கோரிக்கையின்படியும், உடனடியாக அமலுக்கு வரும் வகையில், அமெரிக்காவிற்கும் இந்தியாவிற்கும் இடையே ஒரு வர்த்தக ஒப்பந்தத்திற்கு நாங்கள் ஒப்புக்கொண்டோம்.
இதன் மூலம் அமெரிக்கா பரஸ்பர வரியைக் குறைத்து, 25% இலிருந்து 18% ஆகக் குறைக்கும். அதேபோல், அவர்களும் அமெரிக்காவிற்கு எதிரான தங்கள் வரிகள் மற்றும் வரியல்லாத தடைகளை பூஜ்ஜியமாகக் குறைக்க நடவடிக்கை எடுப்பார்கள். பிரதமர் மோடி 500 பில்லியன் டாலருக்கும் அதிகமான அமெரிக்க எரிசக்தி, தொழில்நுட்பம், விவசாயம், நிலக்கரி மற்றும் பல தயாரிப்புகளுக்கு மேலதிகமாக, "அமெரிக்கப் பொருட்களை வாங்குவதாகவும்" உறுதியளித்தார்.

இந்தியா உடனான நமது அற்புதமான உறவு இனிவரும் காலங்களில் இன்னும் வலுப்பெறும். பிரதமர் மோடியும் நானும் காரியங்களைச் சாதிக்கும் இருவர், இது பெரும்பாலானோரால் செய்ய முடியாத ஒன்று. இந்த விஷயத்தில் உங்கள் கவனத்திற்கு நன்றி!" எனத் தெரிவித்துள்ளார்.

English summary

US Tax: US President Donald trump says that, "Out of friendship and respect for Prime Minister Modi and, as per his request, effective immediately, we agreed to a Trade Deal between the United States and India, whereby the United States will charge a reduced Reciprocal Tariff, lowering it from 25% to 18%.".