பிரதமர் ரேஸில் யாருக்கு முன்னிலை.. மோடியா? ராகுலா?.. இந்தியா டுடே - கார்வி இன்சைட்ஸ் சர்வே

பிரதமர் வேட்பாளராக அறிவிக்கப்பட்டால் மோடிக்குத்தான் மக்கள் அதிக ஆதரவு அளிப்பார்கள் என்று இந்தியா டுடே - கார்வி இன்சைட்ஸ் நடத்திய சர்வேயில் தெரிவிக்கப்பட்டுள்ளது.

By Shyamsundar

Updated: Monday, August 20, 2018, 11:40 [IST]

டெல்லி: பிரதமர் வேட்பாளராக அறிவிக்கப்பட்டால் மோடிக்குத்தான் மக்கள் அதிக ஆதரவு அளிப்பார்கள் என்று இந்தியா டுடே - கார்வி இன்சைட்ஸ் நடத்திய சர்வேயில் தெரிவிக்கப்பட்டுள்ளது.

இன்னும் சில மாதங்களில் நாடாளுமன்ற தேர்தல் நடக்க உள்ளது. சமயத்தில் இந்த வருடம் இறுதியில் கூட தேர்தல் நடக்க வாய்ப்புள்ளது என்று தகவல் வெளியாகி உள்ளது. இந்த நிலையில் இந்தியா டுடே - கார்வி இன்சைட்ஸ் அமைப்பு இணைந்து இந்தியா முழுக்க சர்வே நடத்தியது.

அடுத்த தேர்தல், கடந்த 4 ஆண்டு பாஜக ஆட்சி, பிரதமர் வேட்பாளர் ஆகிய பல விஷயங்கள் குறித்து இதில் கேள்வி கேட்கப்பட்டது. இந்த சர்வே முடிவுகள் தற்போது வெளியாகி உள்ளது.

மோடிக்கு ஆதரவு

அதன்படி பிரதமர் வேட்பாளராக மீண்டும் மோடி அறிவிக்கப்பட்டால், மோடிக்கே மக்கள் அதிக ஆதரவு அளிப்பார்கள் என்று கூறப்பட்டுள்ளது. அதாவது மொத்தமாக மோடிக்கு 49 சதவிகித மக்கள் ஆதரவு அளிக்கிறார்கள். மீண்டும் அவர் பாஜக சார்பாக நிறுத்தப்பட்டால் பிரதமராக வாய்ப்புள்ளது என்று கூறப்பட்டுள்ளது.

ராகுல்

காங்கிரஸ் தலைவர் ராகுல் காந்தி இரண்டாம் இடம் பிடித்துள்ளார். ராகுல் காந்திக்கு 27 சதவிகித மக்கள் ஆதரவு அளிக்கிறார்கள். அதாவது முன்பை விட ராகுல் காந்திக்கு மக்கள் ஆதரவு அதிகம் ஆகியுள்ளதாக இதன் மூலம் தெரிய வந்துள்ளது.

மாற்று யார்

அதேபோல் இதில் பிரதமர் மோடிக்கு சிறந்த மாற்று யார் என்றும் கேள்வி கேட்கப்பட்டது. இதில் மோடிக்கு மாற்று ராகுல்தான் என்று 46% மக்கள் தெரிவித்துள்ளனர். மமதா பானர்ஜிதான் மாற்று என்று 8% மக்கள் தெரிவித்து இருக்கிறார்கள். இதனால் ராகுல் ரேஸில் முன்னிலையில் உள்ளார்.

வேறு யார் மாற்று

மோடிக்கு மாற்று என்று இன்னும் சில முக்கியமான தலைவர்களின் பெயரும் கூறப்பட்டுள்ளது. ப. சிதம்பரம்தான் மோடிக்கு மாற்று என்று 6% மக்கள் தெரிவித்துள்ளனர். பிரியங்கா காந்தி என்று 6% மக்கள் தெரிவிக்கிறார்கள். அகிலேஷ் யாதவ் என்று 4% மக்கள் தெரிவிக்கிறார்கள். அரவிந்த் கெஜ்ரிவால் என்று 4% மக்கள் தெரிவிக்கிறார்கள்.