மேனகா சஞ்சய் காந்தி

காந்தி குடும்பத்தின் போராளி என்று வர்ணிக்கப்படுபவர் மேனகா காந்தி. அரசியலில் ஒரு புயல் போல நுழைந்தவர். தனது கணவர் சஞ்சய் காந்தி மரணமடைந்த பிறகு மாமியார் இந்திரா காந்தியால் குடும்பத்திலிருந்தே வெளியேற்றப்பட்டார். தனது மகன் ராஜீவ் காந்திக்காக தான் செய்து வந்த வேலைகளுக்கு மேனகா குந்தகம் விளைவிப்பதாக இந்திரா காந்தி கருதினார். ஆனால் யாருக்கும் இடையூறாக இல்லாமல் தனக்கென தனிப் பாதை வகுத்து அரசியலில் முன்னேறி சாதித்தார் மேனகா காந்தி. தனது மகன் வருண் காந்தியுடன், இந்திரா குடும்பத்துக்கு எதிராக தீரத்துடன் போராடினார். அவர் தனது போராட்டத்தில் சற்றும் பின்வாங்கியதே இல்லை. அமேதி தொகுதியில் 1984ம் ஆண்டு ராஜீவ் காந்திக்கு எதிராக போட்டியிட்டு தோல்வி அடைந்தார். 1989ம் ஆண்டு அவர் ஜனதாதளத்தில் இணைந்தார். பிலிபிட் தொகுதியில் போட்டியிட்டு வெற்றி பெற்றார். அந்த ஆண்டு காங்கிரஸ் ஆட்சிக்கு முற்றுப் புள்ளி வைத்து ஜனதாதளம் கட்சி ஆட்சியைப் பிடித்தது. பிலிபிட் தொகுதியிலிருந்து மொத்தம் 6 முறை போட்டியிட்டு வென்றவர் மேனகா காந்தி. 1998 மற்றும் 1999 ஆகிய ஆண்டுகளில் அவர் சுயேச்சையாகப் போட்டியிட்டு வெற்றி பெற்றார். 2004ம் ஆண்டு அவரும், அவரது மகனும் பாஜகவில் இணைந்தநர். அதன் பிறகு தொடர்ந்து பிலிபிட் தொகுதியில் மேனகாதான் வென்று வருகிறார். தற்போது மேனகா காந்தி மத்திய அமைச்சரவையில் அமைச்சராக உள்ளார்.