திருமதி மீனாட்சி லேகி

மீனாட்சி லேகி பாரதீய ஜனதா கட்சியைச் சேர்ந்த அரசியல்வாதி ஆவார்.

தற்போது அவர் மக்களவையில் புது தில்லி தொகுதியின் உறுப்பினராக உள்ளார். பாரதீய ஜனதா கட்சியின் தேசிய செய்தித் தொடர்பாளராகவும், உச்சநீதிமன்ற வழக்கறிஞராகவும் உள்ளார். மீனாட்சி லேகி, பாரதிய ஜனதா கட்சியில் பல்வேறு பொறுப்புகளை வகித்து வருகிறார். தி வீக் இதழில் 'ஃபோர்த்ரைட்' என்ற தலைப்பில் கட்டுரைகளை எழுதி வருகிறார். தொலைக்காட்சி நிகழ்ச்சிகள் மற்றும் பத்திரிகைகளில் பல்வேறு பிரச்சினைகள் பற்றி அவர் விவாதங்களில் பங்கேற்கிறார்.

தேசிய மனித உரிமை ஆணையத்தில் பல்வேறு பிரச்சினைகள் தொடர்பாக இவர் உரையாற்றியுள்ளார். பாலின பயிற்சி திட்டங்கள் தொடர்பாக பல்வேறு அமைச்சகங்களுடன் இணைந்து செயல்பட்டு வருகிறார். "மகளிர் இட ஒதுக்கீடு மசோதா" மற்றும் "பணியிடத்தில் பாலியல் துன்புறுத்தல் பிரச்சனை" பற்றிய நாடாளுமன்ற வரைவு குழுவில் உறுப்பினராகவும் உள்ளார். மீனாட்சி 1967ம் ஆண்டு ஏப்ரல் மாதம் 30 தேதி அன்று புது தில்லியில் பிறந்தார். ஒரு நடுத்தர வர்க்க குடும்பத்தில் இருந்து வந்த ஒரு அற்புதமான பெண் அவர். அவர் தில்லி பல்கலைக் கழகத்தின் புகழ்பெற்ற இந்துக் கல்லூரியில் இருந்து இளங்கலை தாவரவியல் துறையில் பட்டம் பெற்றார். பின்னர், தொலைதூர கல்வி வழியில் தனது சட்டபடிப்பை முடித்தார். 1990 ஆம் ஆண்டு தில்லி-பார் கவுன்சிலில் பதிவு செய்தார். அவரது மாமனார் மறைந்த பிரன்நாத் லேகி, புகழ்பெற்ற உச்ச நீதிமன்ற வழக்கறிஞராக இருந்தவராவார். உச்சநீதிமன்றத்தின் வழக்கறிஞரான அமன் லேகியை காதலித்து கரம் பிடித்தவர் மீனாட்சி லேகி. பார் கவுன்சில் தேர்தலில் வேட்பாளராக போட்டியிடும் போது மீனாட்சிலேகி அமன் லேகியை சந்தித்தார். இவர்கள் 1992ம் ஆண்டு ஏப்ரல் மாதம் 11ம் நாள் அன்று திருமணம் செய்து கொண்டார்கள். இவர்களுக்கு மூன்று குழந்தைகள் உள்ளனர்.